पुत्रत्वं तु गते विष्णौ राज्ञस्तस्य महात्मनः।
उवाच देवताः सर्वाः स्वयम्भूर्भगवानिदम्॥

सत्यसन्धस्य वीरस्य सर्वेषां नो हितैषिणः।
विष्णोः सहायान्बलिनः सृजध्वं कामरूपिणः॥

मायाविदश्च शूरांश्च वायुवेगसमाञ्जवे।
नयज्ञान्बुद्धिसम्पन्नान्विष्णुतुल्यपराक्रमान्॥

असंहार्यानुपायज्ञान्सिंहसंहननान्वितान्।
सर्वास्त्रगुणसम्पन्नानमृतप्राशनानिव॥

अप्सरःसु च मुख्यासु गन्धर्वीणां तनूषु च।
यक्षपन्नगकन्यासु ऋक्षविद्याधरीषु च॥

किन्नरीणां च गात्रेषु वानरीणां तनूषु च।
सृजध्वं हरिरूपेण पुत्रांस्तुल्यपराक्रमान्॥

पूर्वमेव मया सृष्टो जाम्बवानृक्षपुङ्गवः।
जृम्भमाणस्य सहसा मम वक्त्रादजायत॥

ते तथोक्ता भगवता तत्प्रतिश्रुत्य शासनम्।
जनयामासुरेवं ते पुत्रान्वानररूपिणः॥

ऋषयश्च महात्मानः सिद्धविद्याधरोरगाः।
चारणाश्च सुतान्वीरान्ससृजुर्वनचारिणः॥

वानरेन्द्रं महेन्द्राभमिन्द्रो वालिनमूर्जितम्।
सुग्रीवं जनयामास तपनस्तपतां वरः॥

बृहस्पतिस्त्वजनयत्तारं नाम महाहरिम्।
सर्ववानरमुख्यानां बुद्धिमन्तमनुत्तमम्॥

धनदस्य सुतः श्रीमान्वानरो गन्धमादनः।
विश्वकर्मा त्वजनयन्नलं नाम महाहरिम्॥

पावकस्य सुतः श्रीमान्नीलोऽग्निसदृशप्रभः।
तेजसा यशसा वीर्यादत्यरिच्यत वानरान्॥

रूपद्रविणसम्पन्नावश्विनौ रूपसम्मतौ।
मैन्दं च द्विविदं चैव जनयामासतुः स्वयम्॥

वरुणो जनयामास सुषेणं नाम वानरम्।
शरभं जनयामास पर्जन्यस्तु महाबलम्॥

मारुतस्यात्मजः श्रीमान्हनुमान्नाम वानरः।
वज्रसंहननोपेतो वैनतेयसमो जवे।
सर्ववानरमुख्येषु बुद्धिमान्बलवानपि॥

ते सृष्टा बहुसाहस्रा दशग्रीववधे रताः।
अप्रमेयबला वीरा विक्रान्ता कामरूपिणः॥

मेरुमन्दरसङ्काशा वपुष्मन्तो महाबलाः।
ऋक्षवानरगोपुच्छाः क्षिप्रमेवाभिजज्ञिरे॥

यस्य देवस्य यद्रूपं वेषो यश्च पराक्रमः।
अजायत समस्तेन तस्य तस्य सुतः पृथक्॥

गोलाङ्गूलीषु चोत्पन्नाः केचित्सम्मतविक्रमाः।
ऋक्षीषु च तथा जाता वानराः किन्नरीषु च॥

देवा महर्षिगन्धर्वास्तार्क्ष्या यक्षा यशस्विनः।
नागाः किम्पुरुषाश्चैव सिद्धविद्याधरोरगाः॥

बहवो जनयामासुर्हृष्टास्तत्र सहस्रशः।
चारणाश्च सुतान्वीरान्ससृजुर्वनचारिणः।
वानरान्सुमहाकायान्सर्वान्वै वनचारिणः॥

अप्सरःसु च मुख्यासु तथा विद्याधरीषु च।
नागकन्यासु च तथा गन्धर्वीणां तनूषु च॥

कामरूपबलोपेता यथाकामं विचारिणः।
सिंहशार्दूलसदृशा दर्पेण च बलेन च॥

शिलाप्रहरणाः सर्वे सर्वे पादपयोधिनः।
नखदंष्ट्रायुधाः सर्वे सर्वे सर्वास्त्रकोविदाः॥

विचालयेयुः शैलेन्द्रान्भेदयेयुः स्थिरान्द्रुमान्।
क्षोभयेयुश्च वेगेन समुद्रं सरितां पतिम्॥

दारयेयुः क्षितिं पद्भ्यामाप्लवेयुर्महार्णवम्।
नभस्थलं विशेयुश्च गृह्णीयुरपि तोयदान्॥

गृह्णीयुरपि मातङ्गान्मत्तान्प्रव्रजतो वने।
नर्दमानाश्च नादेन पातयेयुर्विहङ्गमान्॥

ईदृशानां प्रसूतानि हरीणां कामरूपिणाम्।
शतं शतसहस्राणि यूथपानां महात्मनाम्॥

ते प्रधानेषु यूथेषु हरीणां हरियूथपाः।
बभूवुर्यूथपश्रेष्ठो वीरांश्चाजनयन्हरीन्॥

अन्ये ऋक्षवतः प्रस्थानुपतस्थुः सहस्रशः।
अन्ये नानाविधाञ्शैलान्काननानि च भेजिरे॥

सूर्यपुत्रं च सुग्रीवं शक्रपुत्रं च वालिनं।
भ्रातरावुपतस्थुस्ते सर्व एव हरीश्वराः।
नलं नीलं हनूमन्तमन्यांश्च हरियूथपान्॥

ते तार्क्ष्यबलसम्पन्नाः सर्वे युद्धविशारदाः।
विचरन्तोऽर्दयन्दर्पात्सिंहव्याघ्रमहोरगान्॥

तांश्च सर्वान्महाबाहुर्वाली विपुलविक्रमः।
जुगोप भुजवीर्येण ऋक्षगोपुच्छवानरान्॥

तैरियं पृथिवीशूरैः सपर्वतवनार्णवा।
कीर्णा विविधसंस्थानैर्नानाव्यञ्जनलक्षणैः॥

तैर्मेघवृन्दाचलकूटकल्पैर्महाबलैर्वानरयूथपालैः।
बभूव भूर्भीमशरीररूपैः समावृता रामसहायहेतोः॥