प्रतिगृह्य ततोऽस्त्राणि प्रहृष्टवदनः शुचिः।
गच्छन्नेव च काकुत्स्थो विश्वामित्रमथाब्रवीत्॥

गृहीतास्त्रोऽस्मि भगवन्दुराधर्षः सुरासुरैः।
अस्त्राणां त्वहमिच्छामि संहारं मुनिपुङ्गव॥

एवं ब्रुवति काकुत्स्थे विश्वामित्रो महायशाः।
संहारं व्याजहाराथ धृतिमान्सुव्रतः शुचिः॥

सत्यवन्तं सत्यकीर्तिं धृष्टं रभसमेव च।
प्रतिहारतरं नाम पराङ्मुखमवाङ्मुखं॥

लक्षाक्षविषमौ चैव दृढनाभसुनाभकौ।
दशाक्षशतवक्त्रौ च दशशीर्षशतोदरौ॥

पद्मनाभमहानाभौ दुन्दुनाभसुनाभकौ।
ज्योतिषं कृशनं चैव नैराश्यविमलावुभौ॥

योगन्धरहरिद्रौ च दैत्यप्रशमनौ तथा।
शुचिर्बाहुर्महाबाहुर्निकुलिर्विरुचिस्तथा।
सार्चिमाली धृतिर्माली वृत्तिमान्रुचिरस्तथा॥

पित्र्यं सौमनसं चैव विधूतमकरावुभौ।
करवीरकरं चैव धनधान्यौ च राघव॥

कामरूपं कामरुचिं मोहमावरणं तथा।
जृम्भकं सर्वनाभं च सन्तानवरणौ तथा॥

कृशाश्व-तनयान्राम भास्वरान् कामरूपिणः।
प्रतीच्छ मम भद्रं ते पात्रभूतोऽसि राघव॥

बाढमित्येव काकुत्स्थः प्रहृष्टेनान्तरात्मना।
तत्सर्वमग्रहीद्रामो विश्वामित्रान्महामुनेः॥

दिव्यभास्वरदेहाश्च मूर्तिमन्तः सुखप्रदाः।
केचिदङ्गारसदृशाः केचिद्धूमोपमास्तथा॥

चन्द्रार्कसदृशाः केचित्प्रह्वाञ्जलिपुटास्तथा।
रामं प्राञ्जलयो भूत्वाब्रुवन्मधुरभाषिणः॥

इमे स्म नरशार्दूल शाधि किं करवाम ते॥

मानसाः कार्यकालेषु साहायं मे करिष्यथ।
गम्यतामिति तानाह यथेष्टं रघुनन्दन॥

अथ ते राममामन्त्र्य कृत्वा चापि प्रदक्षिणम्।
एवमस्त्विति काकुत्स्थमुक्त्वा जग्मुर्यथागतम्।
प्रणम्य शिरसा रामं सर्वे सम्मतविक्रमाः॥

ततस्तु रामः काकुत्स्थः शासनाद्ब्रह्मवादिनः।
लक्ष्मणाय च तान्सर्वान्वरास्त्रान्रघुनन्दनः।
संहारान्सच संहृष्टः श्रीमांस्तस्मै न्यवेदयत्॥

स च तान्राघवो ज्ञात्वा विश्वामित्रं महामुनिम्।
गच्छन्नेवाथ मधुरं श्लक्ष्णं वचनमब्रवीत्॥

किं न्वेतन्मेघसङ्काशं पर्वतस्याविदूरतः।
वृक्षषण्डमितो भाति परं कौतूहलं हि मे॥

दर्शनीयं मृगाकीर्णं मनोहरमतीव च।
नानाप्रकारैः शकुनैर्वल्गुनादैरलङ्कृतम्॥

निःसृताः स्म मुनिश्रेष्ठ कान्ताराद्रोमहर्षणात्॥

अनया त्ववगच्छामि देशस्य सुखवत्तया।
सर्वं मे शंस भगवन्कस्याश्रमपदं त्विदम्॥

सम्प्राप्ता यत्र ते पापा ब्रह्मघ्ना दुष्टचारिणः।
तव यज्ञस्य विघ्नाय दुरात्मानो महामते॥

भगवंस्तस्य को देशः सा यत्र तव याज्ञिकी।
रक्षितव्या क्रिया ब्रह्मन्मम वध्याश्च राक्षसाः॥

एतत्सर्वं मुनिश्रेष्ठ श्रोतुमिच्छाम्यहं प्रभो॥